اسلام آباد: ملک کی داخلی و خارجی صورتحال پر غور کیلئے پارلیمنٹ کا ان کیمرہ اجلاس آج شام پانچ بجے پارلیمنٹ ہاؤس میں ہو گا۔ مسلم لیگ ن کے قائد میاں نواز شریف خصوصی دعوت پر اجلاس میں شرکت کریں گے۔ اجلاس کی صدارت اسپیکر قومی اسمبلی ڈاکٹر فہمیدہ مرزا کریں گی۔ قومی اسمبلی سیکریٹریٹ نے اجلاس کے لئے تمام انتظامات کو حتمی شکل دے دی ہے۔ اجلاس کا ایجنڈا بھی تیار کر لیا گیا ہے اجلاس میں اراکین پارلیمنٹ کو داخلی اور خارجی صورتحال سمیت ملکی سلامتی کو درپیش خطرات کے حوالے سے اعتماد میں لیا جائے گا۔

سیکورٹی اداروں کے سربراہان ملک میں جاری دہشت گردی کی لہر اور قبائلی علاقوں میں آپریشن کے بارے میں بریفنگ دیں گے مسلم لیگ ن کے قائد اور سابق وزیراعظم میاں نواز شریف وزیراعظم یوسف رضا گیلانی کی خصوصی دعوت پر اجلاس میں شرکت کریں گے۔ وزیراعظم یوسف رضا گیلانی نے چوہدری شجاعت حسین‘ قاضی حسین احمد‘ عمران خان‘ محمود اچکزئی‘ پیر پگارا اور غلام مصطفی جتوئی کو بھی ان کیمرہ اجلاس میں شرکت کی دعوت دی ہے۔

قومی اسمبلی سیکریٹریٹ کے ذرائع کے مطابق پارلیمنٹ کے مشترکہ سیشن کے موقع پر سخت ترین حفاظتی اقدامات کئے گئے ہیں اور امن و امان قائم رکھنے والے اداروں کو ہائی الرٹ رہنے کی ہدایت کی گئی ہے۔ پارلیمنٹ کا ان کیمرہ اجلاس آج ہو گا ارکان پارلیمنٹ اور اسپیکر کی طرف سے مدعو کئے جانے والے خصوصی مہمانوں کے علاوہ کسی کو پارلیمنٹ میں داخل نہیں ہونے دیا جائے گا۔

مشیر برائے پارلیمانی امور اظہار امروہوی نے آج نیوز سے بات چیت کرتے ہوئے کہا کہ آئین کے آرٹیکل چون کے تحت صدر نے مخصوص حالات میں پارلیمنٹ کا ان کیمرہ اجلاس طلب کیا ہے جس میں ارکان کو اعتماد میں لیا جائے گا۔ انہوں نے بتایا کہ اس اجلاس میں شرکت کے لئے تمام ارکان کو حاضری یقینی بنانے کی ہدایت کی گئی ہے۔ ان کا کہنا تھا کہ خصوصی مہمانوں کے لئے علیحدہ گیلری مختص ہو گی۔ پارلیمانی امور کے مشیر نے کہا کہ اجلاس کے دوران ارکان اہم امور پر سوالات بھی پوچھ سکتے ہیں جبکہ توقع ہے کہ وزیراعظم یوسف رضا گیلانی مشترکہ اجلاس سے خطاب بھی کریں گے۔