کراچی: کے ای ایس سی کو نئی انتظامیہ کے حوالے کرنے کے معاہدے پر دستخط ہو گئے۔ جس کے بعد کویتی کمپنی یکم جولائی کو ادارے کا انتظام سنبھالے گی۔ کراچی الیکٹرک سپلائی کارپوریشن خریدنے والی سعودی کمپنی الجمایا نے کے ای ایس سی کے پچاس فیصد سے زائد حصص کویتی کمپنی الابراج کو فروخت کئے تھے اور اس حوالے سے دونوں کمپنیوں کے درمیان معاہدے پر دستخط ہو گئے ہیں۔ کے ای ایس سی ذرائع کے مطابق کویتی کپمپنی الابراج یکم جولائی سے ادارے کا کنٹرول سنبھالے گی۔ ذرائع کے مطابق نئی کمپنی نے ابتدائی طور پر دو ماہ تک ادارے میں کسی بھی قسم کے تبادلے اور خرید و فروخت پر پابندی عائد کرنے کا حکم جاری کیا ہے۔

ذرائع کے مطابق سعودی کمپنی الجمایا نے ادارے میں پانچ ایگزیکٹو ڈائریکٹرز تعینات کئے تھے لیکن الابراج انتظامیہ ایک ایگزیکٹو ڈائریکٹر اور دیگر شعبوں کا ایک ایک ڈائریکٹر مقرر کرنے کا ارادہ رکھتی ہے۔ ذرائع کا کہنا ہے کہ نئی کمپنی افسران کی چھانٹی اور بڑے پیمانے پر اکھاڑ پچھاڑ کا بھی منصوبہ بنا رہی ہے۔