اسلام آباد: وفاقی وزیر پانی و بجلی راجہ پرویز اشرف نے پندرہ روز میں بجلی کی لوڈ شیڈنگ میں نمایاں کمی کی ہدایت کر دی۔ اسلام آباد میں وفاقی وزیر پانی و بجلی راجہ پرویز اشرف کی زیر صدارت اجلاس ہوا۔ اجلاس میں واپڈا‘ پیپکو‘ جنریشن اور ڈسٹری بیوشنز کمپنیوں کے سربراہان اور اعلیٰ حکام نے شرکت کی۔ اجلاس میں وفاقی وزیر پانی و بجلی نے بتایا کہ اگلے ایک ہفتے میں بجلی کی پیداوار میں چار سو پچاس میگا واٹ کا اضافہ ہو گا۔ انہوں نے ڈسٹری بیوشن کمپنیوں کے سربراہان کو ہدایت کی کہ وہ تین ماہ کے اندر اپنے لائن لاسز کو دس فیصد تک ضرور کم کریں۔ اجلاس کے دوران بتایا گیا کہ وزیراعظم نے پاور پلانٹ کو گیس کی فراہمی اولین ترجیح قرار دے دیا ہے اس لئے وزیراعظم کی ہدایت پر سب سے پہلے پاور جنریشن سیکٹر کو گیس فراہم کی جائے گی۔