کراچی: پیٹرولیم مصنوعات کی قیمتوں میں اضافے کے خلاف کراچی ٹرانسپورٹ اتحاد نے دو روزہ پہیہ جام ہڑتال کا اعلان کر دیا۔ کراچی میں پریس کانفرنس سے خطاب میں کراچی ٹرانسپورٹ اتحاد کے صدر ارشاد بخاری نے کہا ہے کہ پیٹرولیم مصنوعات کی قیمت میں اضافے کے بعد ٹرانسپورٹرز کا کاروبار جاری رکھنا نا ممکن ہو گیا ہے انہوں نے مطالبہ کیا ہے کہ پیٹرولیم مصنوعات میں اضافہ واپس لیا جائے۔ بصورت دیگر دس اور گیارہ جولائی کو صوبے بھر میں پہیہ جام ہڑتال کی جائے گی۔ ارشاد بخاری نے حکومت کو متنبہ کیا کہ اگر ٹرانسپورٹرز کا مطالبہ پورا نہ کیا گیا تو پہیہ جام ہڑتال غیر معینہ مدت تک بڑھا دی جائے گی۔ سپریم کونسل آف پاکستان ٹرانسپورٹ ایسوسی ایشن، ٹینکرز ایسوسی ایشن، سندھ ٹرانسپورٹ ایسوسی ایشن نے کراچی ٹرانسپورٹرز ایسوسی ایشن کے فیصلے کی حمایت کی ہے۔