کراچی: گیس کی قیمت میں اکتیس اور ٹیکسٹائل سیکٹر کے لئے کیپٹیو پاور پلانٹس کے نرخ میں اڑسٹھ فیصد اضافہ ناقابل برداشت ہے ۔لاگت پیداوار میں اضافے سے سیکڑوں صنعتیں بند ہو جائیں گی۔کراچی میں منعقدہ ٹیکسٹائل ایسوسی ایشنز کے اجلاس میں کہا گیا کہ قدرتی گیس کی قیمت میں حالیہ اضافہ ٹیکسٹائل سیکٹر کے لئے زہر قاتل ہے ۔اس اضافے سے نہ صرف ٹیکسٹائل انڈسٹریز کی لاگت پیداوار میں اضافہ ہو گا بلکہ برآمدات میں بھی کمی ہو گی ۔

اجلاس میں کہا گیا کہ فرٹیلائزر سیکٹر کے کیپٹیو پاور پلانٹ کے لئے نرخ میں اکتیس فیصد اضافہ کیا گیا ہے ،جبکہ ٹیکسٹائل کے لئے یہ اضافہ اڑسٹھ فیصد ہے ،اگر فیصلے پر نظر ثانی نہ کی گئی تو اسے چیلنج کیا جائے گا ۔حکومت کے اس اقدام سے بیشتر ٹیکسٹائل ملیں بند ہو جائیں گی ،جس کے نتیجے میں نہ صرف بیروزگاری میں اضافہ ہو گا بلکہ بر آمدات میں کمی اور تیار شدہ ٹیکسٹائل مصنوعات کی درآمدمیں اضافہ ہو گا ۔