کراچی: سندھ میں گندم کی بین الاضلاعی نقل و حمل پر پابندی ختم کر دی گئی۔ وزیراعلیٰ سندھ نے ایک ہفتے میں آٹے کی فی کلو گرام قیمت سات سے آٹھ روپے کم کرنے کا حکم دے دیا۔ وزیراعلیٰ سندھ سید قائم علی شاہ کی زیر صدارت اعلیٰ سطح کا اجلاس ہوا جس میں سندھ فلور ملز ایسوسی ایشن کے عہدیداروں نے بھی شرکت کی۔ بعدازاں میڈیا سے گفتگو میں وزیراعلیٰ سندھ نے گندم کی بین الاضلائی نقل و حمل پر عائد پابندی ختم کرنے کا اعلان کیا اور کہا کہ فلور ملز مالکان کو صوبے بھر سے گندم کی خریداری کی اجازت ہو گی۔

انہوں نے سندھ فلور ملز ایسوسی ایشن کی یقین دہانی پر اعلان کیا کہ اگلے سات روز میں آٹے کی فی کلو گرام قیمت تیس روپے سے کم کر کے بائیس سے تئیس روپے کر دی جائے گی۔ انہوں نے بتایا کہ صوبے میں گندم اور آٹے کی قلت اور مہنگے داموں فروخت کی وجہ منافع خوروں کی جانب سے گندم کی ذخیرہ اندوزی ہے جن کے خلاف سخت کارروائی کی جائے گی۔