کراچی: اوپن مارکیٹ میں گندم کی سو کلو گرام بوری کی قیمت دو ہزار آٹھ سو پچیس روپے کی نئی بلند ترین سطح پر پہنچ گئی۔ پاکستان فلور ملز ایسوسی ایشن سندھ زون کے چیئرمین کے مطابق گندم کی بوری کی قیمت میں مسلسل اضافے کا رجحان جاری ہے اور پیر کو اوپن مارکیٹ میں گندم کی سو کلو گرام بوری کی قیمت میں پچیس روپے مزید اضافہ ریکارڈ کیا گیا جس کے بعد بوری کی قیمت دو ہزار آٹھ سو پچیس روپے کی ریکارڈ سطح پر پہنچ گئی۔

ان کا کہنا تھا کہ حکومت فلور ملوں کو ہفتے وار بنیاد پر سترہ سو پچانوے بوری گندم فراہم کر رہی ہے لیکن ملکی طلب کے پیش نظر فلور ملز اوپن مارکیٹ سے مہنگی گندم خریدنے پر مجبور ہیں اس لئے موجودہ قیمت پر آٹے کی فروخت مشکل ہے۔ ایسوسی ایشن کے چیئرمین نے حکومت سے مطالبہ کیا کہ فلور ملز کے کوٹے میں فوری اضافہ کیا جائے تا کہ موجودہ قیمت پر آٹے کی فروخت جاری رہ سکے۔