لاہور: پنجاب میں بیس کلو آٹے کے تھیلے کی قیمت میں ایک سو بیس روپے اضافے سے صارفین کی قوت خرید بری طرح متاثر ہوئی ہے۔ حکومت پنجاب کی جانب سے آٹے پرسبسڈی کے خاتمے اور وفاقی حکومت کی طرف سے گندم کی امدادی قیمت میں اضافے سے پنجاب میں بیس کلو تھیلے کی سرکاری قیمت تین سو سے بڑھ کر چار سو بیس روپے تک پہنچ گئی۔ صارفین کا کہنا ہے کہ سبسڈی واپس لئے جانے کے بعد دکاندار رمضان پیکیج کے دوران ذخیرہ کیا گیا سستا آٹا موجودہ قیمت پر بیچ رہے ہیں۔ پنجاب میں جھنگ کے علاوہ کہیں بھی آٹے کی کمی کی اطلاع نہیں ہے، لیکن قیمت میں اضافے کے باعث خریداری میں نمایاں کمی آئی ہے۔

فلورملزمالکان کا موقف ہے کہ آٹے پر صوبائی حکومت کی جانب سے سبسڈی کی فراہمی وقتی اقدام تھا۔ جس کے بعد ملوں کو جاری کی جانیوالی گندم کی قیمت میں اضافے اور کھلی منڈی میں گندم کے نرخ نو سو پچاس روپے فی من تک پہنچنے کے بعد آٹا مہنگا ہونا ناگزیر تھا۔ مل مالکان نے خدشہ ظاہر کیاکہ نئی فصل آنے سے پہلے گندم کی قیمت مزید بڑھ سکتی ہے۔ماضی میں برصغیر کا اناج گھر کہلانے والے پنجاب میں آٹے جیسی بنیادی غذائی ضرورت کی گرانی لمحہ فکریہ ہے۔