کراچی: حکومت نے کے ای ایس سی کو بجلی کے نرخوں میں اکتیس فیصد فوری اضافے سے روک دیا۔ کے ای ایس سی کی نئی انتظامیہ ابراج نے بجلی کی قیمتوں میں اضافے کی درخواست نیپرا کو دی تھی جس پر نیپرا نے وزارت پانی و بجلی سے رابطہ کیا تو معلوم ہوا کہ حکومت پاکستان اور کے ای ایس سی کی پرانی انتظامیہ الجمعیا کے درمیان تین سال تک شیئرز فروخت نہ کرنے کا معاہدہ ہوا تھا یہ معاہدہ انتیس اکتوبر دو ہزار آٹھ تک موثر ہے اور حکومت کو ابراج انتظامیہ کے بارے میں علم نہیں اس لئے نئی انتظامیہ اکتوبر کے بعد ہی درخواست دے سکے گی لہٰذا حکومت پاکستان ابراج گروپ کو بجلی کی قیمتوں میں اضافہ کا نوٹیفکیشن جاری کرنے کی اجازت نہیں دے سکتی۔

دوسری جانب ملک بھر کی طرح کراچی کی طلب پورا کرنے میں دو سو میگا واٹ کمی کا سامنا ہے۔ جسے پورا کرنے کے لئے دن میں دو بار دو دو گھنٹے کی لوڈ شیڈنگ کی جا رہی ہے۔