واشنگٹن: ورلڈ بینک کے سربراہ رابرٹ زوئیلک نے کہا ہے کہ عالمی مالیاتی بحران بہت سے چھوٹے ملکوں کو لے ڈوبے گا۔ واشنگٹن میں ایک تھنک ٹینک سے خطاب میں عالمی بینک کے سربراہ رابرٹ زوئیلک نے کہا کہ موجودہ مالیاتی بحران کو حل کرنے کے لئے نیا عالمی اقتصادی ڈھانچا ضروری ہے۔ انہوں نے کہا کہ دنیا کو مالی بحران کی وجوہ اور ممکنہ نتائج کو سمجھنا ہوگا۔ رابرٹ زوئیلک نے کہا کہ عالمی مالیاتی اداروں میں کثیر الجہت پالیسیوں کی ضرورت ہے تاکہ مالیاتی نظام کو باہم تعاون کی بنیاد پر چلایا جاسکے۔

انہوں نے ورلڈ ٹریڈ آرگنائزیشن اور آئی ایم ایف میں اصلاحات کی ضرورت پر زور دیا ۔ زوئیلک نے کہا کہ آج کی دنیا توانائی ماحولیاتی اور اقتصادی مسائل میں گرفتار ہے۔ انہوں نے کہا کہ سات صنعتی ممالک کا گروپ جی سیون عالمی معیشت کے لئے کچھ نہیں کررہا۔ انہوں نے تجویز دی کہ اقتصادی و مالیاتی اصلاحات کے لئے جی سیون میں برازیل چین ،بھارت،میکسیکو، روس،سعودی عر ب اور جنوبی افریقا کو بھی شامل کیا جائے۔