اسلام آباد: پبلک اکاؤنٹس کمیٹی نے واپڈا‘ سی ڈی اے اور ریلوے کی آڈٹ رپورٹ چار ماہ میں مکمل کر کے صدر کو بھجوانے کی ہدایت کر دی۔ پارلیمنٹ ہاؤس میں چیئرمین چوہدری نثار علی خان کی زیر صدارت اجلاس میں پبلک اکاؤنٹس کمیٹی کے آئندہ تین ماہ کے اجلاسوں کا شیڈول ترتیب دیا گیا۔ اجلاس میں اسفند یار ولی‘ ڈاکٹر عذرا فضل ،خواجہ آصف ،ریاض پیرزادہ اور حیدر عباس رضوی کی قیادت میں پانچ سب کمیٹیاں تشکیل دی گئیں۔ اجلاس میں فیصلہ کیا گیا کہ واپڈا،سی ڈی اے اور ریلوے کی آڈٹ رپورٹ چار ماہ میں مکمل کر کے صدر کو بھجوائی جائے۔ کمیٹی نے نیشنل ہائی وے اتھارٹی اور اکادمی ادبیات کا پرفارمنس آڈٹ کرانے کا بھی فیصلہ کیا۔ آڈیٹر جنرل آف پاکستان تنویر علی نے کمیٹی کو بریفنگ دیتے ہوئے کہا کہ ان کے پاس کوئی چارٹرڈ اکاؤنٹنٹ نہیں ہے۔ سیکریٹری پبلک اکاؤنٹس کمیٹی نے اجلاس کو بتایا کہ تئیس ہزار آٹھ سو چھیانوے آڈٹ اعتراضات زیر التوا ہیں۔ چیئرمین پی اے سی چوہدری نثار علی خان کا کہنا تھا کہ حسابات کے سلسلے میں وفاقی سیکریٹریوں کی پی اے سی کے اجلاس میں شرکت کے حوالے سے کوئی معذرت قبول نہیں کی جائے گی ادارے اور وزارتیں کمیٹی کی ہدایات پر عمل درآمد یقینی بنائیں۔