کراچی: ملک بھر میں آٹے کی قیمت میں اضافے کا رجحان جاری ہے۔ ملک بھر میں آٹے کی فی کلو گرام قیمت میں اضافہ ہوا ہے۔ اسلام آباد اور راولپنڈی میں بیس کلو گرام آٹے کا تھیلا چار سو بیس روپے میں فروخت ہو رہا ہے۔ لاہور میں گندم کی نئی قیمت کے اعلان کے ساتھ ہی مارکیٹ میں گندم کے نرخ سات سو ساٹھ روپے فی چالیس کلو گرام سے بڑھ کر نو سو پچاس روپے ہو گئے۔ کراچی کی ہول سیل مارکیٹ میں آٹے کی قیمت پچاس پیسے اضافے سے پینتیس روپے پچاس پیسے ہو گئی اور ریٹیل مارکیٹ میں آٹا ایک روپے کے اضافے سے پینتیس روپے فی کلو گرام کی ریکارڈ سطح پر پہنچ گیا۔

قیمت بڑھنے کے باعث یوٹیلیٹی اسٹور پر بھی سستا آٹا دستیاب نہیں ہے۔ آٹے کی قلت کی وجہ سے عوام کو شدید مشکلات کا سامنا ہے۔ دوسری جانب اسمگلنگ کے باعث صوبہ بلوچستان کے سرحدی علاقوں میں آتے کی قلت پیدا ہو گئی ہے۔ کوئٹہ میں آٹے کا بیس کلو گرام کا تھیلا آٹھ سو روپے میں فروخت ہو رہا ہے۔ فلور مل مالکان نے اپنے ساتھی کے اغوا کے بعد بطور احتجاج جمعرات سے ملز بند کرنے کی دھمکی دی ہے۔ چمن‘ قلعہ سیف اللہ‘ پنجگور‘ دالبندین اور ماشکیل میں ایک کلو گرام آٹا پچاس سے باون روپے میں فروخت ہو رہا ہے۔

پشاور سمیت صوبہ سرحد کے مختلف علاقوں میں بیس کلو گرام آٹے کا تھیلا چار سو نوے روپے سے بڑھ کر چھ سو ستر روپے کا ہو گیا ہے جبکہ فائن آٹے کا بیس کلو گرام کا تھیلا سات سو پچاس روپے سے لے کر آٹھ سو روپے میں فروخت ہو رہا ہے سرحد حکومت نے پنجاب حکومت سے یومیہ چار لاکھ ٹن آٹا فراہم کرنے کی درخواست کی ہے۔ ادھر ڈسٹرکٹ فوڈ کنٹرولرز کو گراں فروشوں کے خلاف کارروائی کرنے کی ہدایت بھی کی گئی ہے۔ مردان میں آٹے کا بحران سنگین ہو گیا۔ فائن آٹے کے بیس کلو گرام کا تھیلا سات سو بیس روپے کی ریکارڈ سطح پر پہنچنے کے باوجود بازار میں دستیاب نہیں ہے۔