کوئٹہ: پیٹرولیم مصنوعات کی قیمتوں میں کمی کے بعد کوئٹہ میں مالکان نے تمام پمپ بند کر دیئے۔ شہریوں کو پیٹرول اور ڈیزل کے حصول میں سخت مشکلات کا سامنا ہے۔ پیٹرولیم مصنوعات کی قیمتوں میں کمی کے اعلان کے بعد کوئٹہ میں مالکان نے تمام پمپ بند کر دیئے جس کی وجہ سے شہری سارا دن پیٹرول کی تلاش میں مارے مارے پھرتے رہے لیکن وہ پیٹرول کے حصول میں ناکام رہے۔ پمپ پر کام کرنے والے کارکنوں کا کہنا ہے کہ پیٹرول سستا ہونے کی وجہ سے لوگوں نے اپنی گاڑیوں میں ضرورت سے زیادہ پیٹرول بھروایا جس کی وجہ سے پیٹرول ختم ہو گیا۔

شہریوں کا کہنا ہے کہ پیٹرول مہنگا ہونے کے بعد کبھی ختم نہیں ہوتا۔ لیکن سستا ہونے کے بعد پمپ بند کر دیئے جاتے ہیں۔ شہریوں نے حکومت سے پیٹرول اور ڈیزل کی فراہمی کو یقینی بنانے کا مطالبہ کیا ہے۔ دوسری جانب پیٹرولیم مصنوعات کی قیمتوں میں کمی کے باوجود شہر میں چلنے والے رکشا اور بس مالکان نے کرائے میں کوئی کمی نہیں کی ہے۔