پیرس: قرضوں کی بڑھتی ہوئی طلب پوری کرنے کے لئے آئی ایم ایف کو مزید سو ارب ڈالر درکار ہیں۔ آئی ایم ایف کے سربراہ ڈومینک اسٹاس کاہن نے پیرس میں بی بی سی کو انٹرویو دیتے ہوئے کہا کہ مالی مشکلات سے دوچار ملکوں کی تعداد میں اضافہ ہو رہا ہے اور وہ آئی ایم ایف کی مدد چاہتے ہیں اس لئے ہمیں مزید وسائل کی ضرورت ہے۔ ان کا کہنا تھا کہ ہمیں یہ رقم چھ ماہ میں درکار ہو گی اور میرے خیال میں تمام سربراہان مملکت آئی ایم ایف کو مضبوط بنانے کی اہمیت سے آگاہ ہیں۔

آئی ایم ایف کے سربراہ نے جی ٹوئنٹی سربراہ کانفرنس کے نتائج پر اطمینان کا اظہار کرتے ہوئے کہا کہ جاپان نے بینک کو سو ارب ڈالر فراہم کرنے کا ارادہ ظاہر کیا ہے جس کا مطلب یہ ہے کہ جاپان کے پاس کافی وسائل ہیں۔ ان کا کہنا تھا کہ فنڈ سب سے کمزور طبقات کو مشکلات سے بچانے کے لئے سیفٹی نیٹ فراہم کرے گا۔