لندن : عالمی بینک کے صدر نے کہا ہے کہ رواں سال قرضوں کی فراہمی کا حجم پینتیس ارب ڈالر تک بڑھ سکتا ہے۔ ورلڈ بینک کے صدر رابرٹ زوئیلک کے مطابق عالمی سطح پر جاری حالیہ معاشی اور مالیاتی بحران کی وجہ سے ترقی پزیر ممالک بڑے پیمانے پر متاثر ہو رہے ہیں اور انہیں فوری تعاون کی ضرورت ہے۔

موجودہ صورتحال کے پیش نظر عالمی بینک نے ترقی پذیر ممالک کی شرح ترقی کی پیش گوئی چھ اعشاریہ چار فیصد سے کم کر کے چار اعشاریہ چھ فیصد کر دی ہے۔ ساتھ ہی عالمی بینک گزشتہ سال ساڑھے تیرہ ارب ڈالر کے قرضوں کے مقابلے میں رواں سال پینتیس ارب ڈالر کے قرضے جاری کر سکتا ہے۔ عالمی بینک کے صدر کا کہنا ہے کہ موجودہ بحران ترقی پذیر معیشتوں کا پیدا کردہ نہیں ہے اس لئے انہیں ترقی یافتہ ممالک کے پیدا کردہ بحران کا خمیازہ نہیں بھگتنا چاہئے۔