اسلام آباد: رواں مالی سال کے پہلے چار ماہ کے دوران پیٹرولیم مصنوعات کا درآمدی بل دگنا ہوگیا۔ صرف اکتوبر میں ننانوے کروڑ ڈالر کا تیل درآمد کیا گیا۔ ملک میں توانا ئی کی طلب میں اضافہ اور روپے کی قدر میں کمی کی وجہ سے تیل کی درآمدی مالیت میں اضافہ ہورہا ہے۔ جولائی سے اکتوبر کے دوران چار ارب چھیاسی کروڑ ڈالر مالیت کا ساٹھ لاکھ میٹرک ٹن تیل درآمد کیا گیا۔ گزشتہ مالی سال اس عرصے میں دو ارب چھیاسی کروڑ ڈالر کا ستاون لاکھ پچانوے ہزار میٹرک ٹن تیل درآمد کیا گیا تھا۔

جولائی سے اکتوبر کے دوران پیٹرولیم مصنوعات کی درآمدی مالیت سو فیصدی اضافے کے ساتھ دو ارب چوہتر کروڑ ڈالر رہی جبکہ دو ارب گیارہ کروڑ ڈالر مالیت کا خام تیل درآمد کیا گیا۔ وفاقی ادارہ شماریات کے مطابق عالمی منڈی میں خام تیل کی قیمتوں میں ریکارڈ کمی کے باوجود اکتوبر دو ہزار آٹھ میں تیل کی درآمد سولہ فیصد بڑھ گئی۔ ماہرین کا کہنا ہے کہ تیل کے بڑھتے ہوئے درآمدی بل کی وجہ سے زرمبادلہ کے ذخائر میں کمی ہورہی ہے اورگذشتہ سال اکتوبر کے مقابلے میں ذخائر کی مالیت میں دس ارب ڈالر کمی ریکارڈ کی گئی۔