اسلام آباد: وزیر اعظم نے کاشتکاروں سے کپاس چودہ سو پینسٹھ روپے فی من خریدنے اور صوبو ں کو گندم کے لئے ٹرانسپورٹیشن کا انتظام خود کرنے کی ہدایت کردی۔ اسلام آباد میں وزیر اعظم یوسف رضا گیلانی کی زیر صدارت گندم،چاول،چینی،کپاس اور کھادوں سے متعلق اجلاس میں فیصلہ کیا گیا کہ ٹریڈنگ کارپوریشن آف پاکستان مارکیٹ میں دو لاکھ ٹن چینی دسمبر کے پہلے ہفتے تک فراہم کردے گی۔ وزیر اعظم نے وزارت صنعت و پیداوار کو ہدایت کی کہ شوگر ملز میں جلد از جلد گنے کی کرشنگ شروع کرائی جائے۔ وزیر اعظم نے ٹی سی پی کو کسانوں سے چاول خرید کر مقامی مارکیٹ میں فراہم کرنے اور پاسکو کو دھان خریدنے کی ہدایت کی۔ وزیر اعظم نے کہا کہ کسانوں کو کھادوں کی وافر مقدار میں باآسانی دستیابی یقینی بنائی جائے۔