کراچی: کراچی الیکٹرک سپلائی کارپوریشن کے لائن لاسز کی شرح پنتیس فیصد ہے۔انتظامیہ نے لائن لاسز میں کمی کے لیے پاور ایکٹ انیس سو دس میں تبدیلی کا مطالبہ کیا ہے۔کے ای ایس سی کے منیجنگ ڈائریکٹر نوید اسماعیل نے آج نیوز سے بات چیت میں بتایا کہ پرانی ڈسٹری بیوشن لائنوں اور بڑھتی ہوئی آبادی کے سبب لائن لاسز بڑھ رہے ہیں جسے کم کرنے کے لیے ہر ماہ تقریبا ساٹھ ہزار کنکشنز منقطع کئے جا رہے ہیں۔ انہوں نے بتایا کہ ستر فیصد بجلی صنعتکار اور بااثر افراد چوری کرتے ہیں۔ بجلی چوری کی حوصلہ شکنی کرنے کیلئے پاور ایکٹ میں ترمیم ضروری ہے۔

نوید اسماعیل کا کہنا تھا کہ آئندہ چار سالوں میں کے ای ایس سی ڈسٹری بیوشن سسٹم کی بہتری اور پاور جنریشن کیلئے چھتیس کروڑ ڈالر کی سرمایہ کاری کرے گی اور درآمدی کوئلے سے چلنے والے پاور پلانٹ لگائے جائیں گے۔ انہوں نے بتایا کہ نیپرا سے باقی ڈسٹری بیوشن کمپنیوں کی طرح کے ای ایس سی کا ٹیرف ایڈجسٹمنٹ بھی ماہانہ بنیاد پر کرنے کی درخواست کی ہے۔