کراچی : اس ہفتے اشیائے خوردونوش کی قیمتوں میں گزشتہ سال کے مقابلے میں نو اعشاریہ نو فیصد اضافہ ہوا۔ حکومتی دعوں کے برخلاف ملک بھر میں اشیائے خورو نوش کی قیمتوں میں اضافے کا سلسلہ جاری ہے۔ وفاقی ادارہ شماریات کے مطابق دو جولائی کو ختم ہونے والے ہفتے کے دوران روزمرہ استعمال کی اشیاء کی قیمتوں میں گزشتہ سال کے مقابلے میں نو اعشاریہ نو دو فیصد اضافہ جبکہ گزشتہ ہفتے کی نسبت اعشاریہ آٹھ نو فیصد کمی ہوئی۔ ایک ہفتے کے دوران روزمرہ استعمال کی ترپن اشیاء میں سے چھبیس کی قیمتوں میں اضافہ، چار میں کمی اور تئیس میں استحکام رہا۔ پانچ ہزار روپے سے زائد ماہانہ آمدنی والا طبقہ مہنگائی سے سب سے زیادہ متاثر ہوا اور اس کے لئے مہنگائی گیارہ اعشاریہ سات فیصد بڑھ گئی۔ اس ہفتے لہسن، ٹماٹر، پیٹرولیم مصنوعات، دال مونگ، دال ماش، آلو، پیاز اور مرغی کا گوشت مہنگا ہوگیا جبکہ ایل پی جی، کھلا گھی، سرخ مرچ اور چاول سستے ہوگئے۔