کراچی : اسٹیٹ بینک نے کہا ہے کہ عالمی مالیاتی فنڈ کے مقرر کردہ تمام اہداف حاصل کر لئے گئے ہیں۔ مرکزی بینک کے ترجمان کے مطابق عالمی مالیاتی فنڈ نے اسٹیٹ بینک کو ہدف دیا تھا کہ اسٹیٹ بینک سے حکومت کے قرضے، خالص مقامی اثاثے اور خالص بیرونی اثاثوں کی مالیت مقررہ حد میں رہنی چاہئے اور گزشتہ سال تیس جون تک اسٹیٹ بینک سے حکومتی قرضوں کی مالیت گیارہ کھرب چھبیس ارب روپے ریکارڈ کی گئی۔ جس کے لئے زیادہ سے زیادہ حد گیارہ کھرب اکیاسی ارب روپے مقرر کی گئی تھی۔ اسی طرح بینکوں کے خالص مقامی اثاثوں کی مالیت تیرہ کھرب چودہ ارب روپے کے مقابلے میں گیارہ کھرب اکیاسی ارب روپے اور خالص بیرونی اثاثے دو سو اٹہتر ارب ڈالر کے مقررہ ہدف کے مقابلے میں چار سو پچاس ارب ڈالر ہوگئے۔