واشنگٹن: ہالی وڈ کے نامور اداکار مورگن فری مین نئی آنے والی فلم ’دی ہیومن فیکٹر‘ میں سابق افریقی صدر نیلسن منڈیلا کا کردار ادا کریں گے ۔ یہ فلم نیلسن منڈیلا پر لکھی جانے والی جون کارلن کی کتاب ’دی ہیومین فیکٹر ، نیلسن منڈیلا اینڈ دی گیم دیٹ چینج دی ورلڈ ‘ سے ماخوذ ہے ۔ فلم کی شوٹنگ اگلے سال جنوبی افریقہ میں شروع ہو گی ،جہاں نیلسن منڈیلا کی صدارت کے دور میں نسلی فسادات کے بعد انیس سو پچیانوے کا رگبی کا ورلڈ کپ کھیلا گیا تھا ۔

مشہور امریکی ہدایت کارٹام شیڈیک اپنے پارٹنر لوری میک کریری کے ہمراہ اس فلم کی ہدایتکار ی کے فرائض انجام دے رہے ہیں جبکہ جنوبی افریقہ کے انتھونی پیکھام اس فلم کا اسکرپٹ لکھ رہے ہیں ۔ فلم کے سلسلے میں پچھلے سال فورمین اور میک کریری نے جنوبی افریقہ کا دورہ بھی کیا تھا اور اپنی فلم کے بارے میں نیلسن منڈیلا سے بھی بات چیت کی تھی ۔ اداکار مورگن فورمین کا کہنا ہے کہ’ میں نیلسن منڈیلا کو قریب سے جانتا ہوں اور یہ میرے لئے بڑے اعزاز کی بات ہے کہ میں فلم میں ان کا کردار ادا کروں‘۔