ممبئی: فلم ”قسمت کنکشن“ کے پروڈیوسر عزیز مرزا نے کہا ہے کہ اس فلم میں پہلے شاہ رخ خان کو کاسٹ کرنے کا سوچا گیا تھا لیکن اس فلم کے مین کردار میں لڑکا پچیس ،چھبیس سال کا دکھایا گیا ہے لیکن شاہ رخ تو چالیس سے اوپر پہنچ گیا ہے اور بوڑھا ہو گیا ہے ان پر یہ رول سوٹ نہیں کرتا۔مرزا نے کہا کہ اس فلم میں سپورٹنگ رول جوہی چاولہ ادا کریں گی ان کا رول کم ہے لیکن جوہی نے اسے بہت اچھے طرح نبھایاتو کیوں میں کسی اور کو ان کی جگہ کاسٹ کرتا۔

مرزا نے کہا کہ اس فلم میں ایک جوان لڑکے کا کردار نبھانے کیلئے میرے نظر میں چاکلیٹ ہیرو شاہد کپور سب سے بہتر تھے اس لیے انھیں کاسٹ کیا گیا اور ان کے مد مقابل ہیروئن ودیا بالن ہیں۔مرزا نے کہا کہ لوگوں کا خیال ہے کہ ودیا دیکھنے میں بڑی لگتی ہیں لیکن میرا خیال ہے کہ ایسا نہیں ہے۔ اس فلم میں شاہد کپور کے ساتھ ان کی جوڑی بہت اچھی لگ رہی ہے۔ انہوں نے کہا کہ قسمت کنکشن اٹھارہ جولائی کو ریلیز ہو جائے گی اور مجھے امید ہے کہ شائقین کو ضرور پسند آئے گی۔

عزیز مرزا اس سے پہلے ”راجو بن گیا جنٹلمین“ یس باس“ پھر بھی دل ہے ہندوستانی“ اور ” چلتے چلتے “ فلم بنا چکے ہیں جبکہ ان کی سب فلموں میں شاہ رخ خان ہی ہیرو کا کردار ادا کرتے رہے۔مرزا نے مزید کہا کہ میں بہت عرصے سے فلم انڈسڑی سے باہر تھا لیکن اپنے بچوں کے کہنے پر دوبارہ سے کام شروع کیا ہے۔اس فلم کا اسکرپٹ میری بیٹی نے لکھا ہے جس کی میں نے صرف مدد کی ہے۔