کراچی۔رپورٹ،ناصرطفیل۔: مشہور فیوژن بینڈ میکا ل حسن کی نئی ویڈیو ”وارث شاہ“ آن ایئر کر دی گئی ہے۔ اس مرتبہ بھی پاکستان کے اینی میشن گرو ذیشان پرویز ہی نے ویڈیو کو ڈائریکٹ کیا ہے۔ ذیشان کی میکال حسن بینڈ کے ساتھ یہ مسلسل چوتھی ویڈیو ہے۔ وارث شاہ کے ویڈیو میں ڈائریکٹر نے اپنی مہارت کو برقرار رکھتے ہوئے گانے کو انوکھا رنگ دیا ہے۔ وارث شاہ کی شاعری مشہور بھارتی ادیبہ امرتا پریتم کی ہے ،جس میں شاعرہ مشہور پنجابی شاعر وارث شاہ کو پکارتے ہوئے زمانے کے بگڑتے پہلوؤں کی طرف اشارہ کر رہی ہے۔

ذیشان نے گانے کی محسوسات کے مطابق ویڈیو تخلیق کیا ہے اور یہ ان کا چوتھا اینی میٹڈ ویڈیو ہے۔ ویڈیو میں بینڈ ممبرزگٹارسٹ میکال، گلوکارجاوید اوربانسر ی نواز پپو کی اینی میشن کمال کی ہے تاہم بیس گٹارسٹ سمیر احمد ویڈیو میں شامل نہیں ہیں۔ وارث شاہ بینڈ کی پہلی البم ”سمپورن“ کا گانا ہے۔ دلچسپ بات یہ ہے کہ بینڈ نے اس سے قبل نئے آنے والے البم ”ہنس دھن“ کے تین ویڈیوز جاری کئے مگر پہلے البم سے وارث شاہ کا ویڈیو شائقین کے لئے دلچسپ اضافہ ہے۔

ویڈیو سے متعلق ہدایت کار ذیشان پرویز کا کہنا ہے کہ ان کی ٹیم نے بھرپور محنت کی ہے اور قریب تین ہزار اسکیچز اس ویڈیو کے لئے بنائے گئے۔ انہوں نے میکال کا شکریہ ادا کیا کہ انہوں نے ویڈیو کی تیاری میں تاخیر پر کوئی اعتراض نہیں کیا اور مکمل طور پر صبر کا مظاہرہ کیا۔