لاہور: بھارتی پنجاب کے معروف گلوکار ہنس راج ہنس نے کہا ہے کہ پاک بھارت عوام کو قریب لانے کے لئے دونوں اطراف کی جانب سے زیادہ سے زیادہ ثقافتی پروگرامز کا اہتمام ہونا چاہیے۔ہنس راج ہنس نے میڈیا سے یہبات لاہور میں ایک ریسٹورانٹ کا افتتاح کرتے ہوئے کہی۔ انہوں نے کہا کہ پاکستان اور بھارت کی تہذیب و تمدن اور مسائل ایک جیسے ہیں اور عوام ایک دوسرے کے لئے محبت کے جذبات رکھتے ہیں لیکن حکومتی پالیسیوں کے باعث وہ ان محبتوں کا کھلم کھلا اظہار کرنے سے قاصر ہیں اس لئے ضروری ہے کہ دونوں ممالک میں زیادہ سے زیادہ ثقافتی پروگرامز کا انعقاد کیا جائے تا کہ باہمی روابط میں اضافہ ہو سکے۔

ہنس راج ہنس نے کہا کہ جب دونوں ملکوں کے عوام کے سْر مل جائیں گے تو پھر دل بھی مل جائیں گے۔ ان کا کہنا تھا کہ لاہور آ کر لاہوریوں کے سامنے پرفارم کر کے ان کی دیرینہ خواہش پوری ہو گئی ہے۔ بھارتی گلوکار نے کہا کہ پاکستان پیروں، فقیروں اور فنکاروں کی دھرتی ہے اور وہ ان سے خصوصی عقیدت رکھتے ہیں۔ہنس راج ہنس پاکستان کے اکسٹھ ویں یوم آزادی کی تقریبات میں شرکت کرنے لاہور آئے ہوئے ہیں۔