نیو یارک: ہالی وڈ کی مشہور اداکارہ اینجلینا جولی اپنی آنے والی نئی فلم’ چینجلنگ ‘ میں اپنے کردار سے بیحد پریشان ہیں ۔ذرائع کے مطابق یہ فلم ایک سچی کہانی پر مبنی ہے اور ایک ایسی ماں کے گرد گھومتی ہے جس کا نوسالہ بیٹا اغوا ہو جاتا ہے اور اس کو ڈھونڈنے کے لئے اسے بہت سی مشکلات کا سامنا کرنا پڑتا ہے۔ اس فلم میں اینجلینا مرکزی کردار ادا کر رہی ہیں۔

اپنے کردار کے حوالے سے بات کرتے ہوئے انہوں نے کہا کہ ’جب میں نے اس فلم کا اسکرپٹ پڑھا تو مجھ سے برداشت نہیں ہوا میں اس کردار کو نہیں کرنا چاہتی تھی کیونکہ یہ میرے لئے بہت مشکل تھا‘۔ان کا کہنا تھا کہ وہ اس کردار کو کرتے ہوئے ایک خوف محسوس کر رہی ہیں اور ان کے دل میں یہ ڈر پیداہو رہا ہے کہ کہیں ان کے بچوں کیساتھ ایسا واقعہ پیش نہ آئے ۔

اینجلینا نے اس بات کا اعتراف کیا کہ وہ اس فلم میں کام کرنے کے دوران بہت جذباتی ہو رہی تھیں اور اپنے بچوں کا پہلے سے کہیں زیادہ خیال رکھ رہی ہیں اور انہیں پہلے سے زیادہ پیار کر رہی تھیں ،اور ان کے پل پل کی خبر لے رہی تھیں۔ انہوں نے کہا کہ چونکہ میں خود دو بچوں کی ماں ہوں اس لئے اس تکلیف کا بخوبی اندازہ لگا سکتی ہوں کہ ایسے حالات اگر کسی ماں کے ساتھ پیش آئیں تو اس کا کیا حال ہوگا،انہوں نے اس حوالے سے بات کرتے ہوئے مزید کہا کہ اور مجھے نہیں لگتا کہ اگر میں ماں نہ ہوتی تو اس کردار کو ٹھیک سے سمجھ پاتی ۔