نئی دہلی: پاکستان میں بھارت کے معروف ہدایت کار سبھاش گھئی کی نئی فلم یووراج کی نمائش جاری ہے۔ بھارتی فلموں کی نمائش سے سنیما ہالوں کی رونقیں بحال ہورہی ہیں۔ اگر ان فلموں میں مشہور اداکار بھی ہوں تو تماشائیوں کی تعداد بہت بڑھ جاتی ہے۔ ایسا ہی کچھ منظر نظر آیا جب سبھاش گھئی کی ڈائریکٹ کردہ فلم یووراج نمائش کے لئے پیش کی گئی۔ فلم میں اسٹارز کاسٹ میں سلمان خان، انیل کپور، زائد خان اور کترینہ کیف شامل ہیں۔ جبکہ اس فلم کی کہانی تین بھائیوں کے گرد گھومتی ہے۔

فلم کی مسحور کن موسیقی معروف میوزک ڈائریکٹر اے آر رحمان نے کمپوز کی ہے۔ فلم کے شوز ہاؤس فل جارہے ہیں اور تماشائیوں نے بھی فلم کی بہت پذیرائی کی ہے۔ پاکستان میں فلم انڈسٹری کے زوال کے بعد سنیماؤں کی جگہ شاپنگ پلازے تعمیر ہورہے ہیں لیکن یووراج کی نمائش سے توقع بندھی ہے کہ یہ سلسلہ تھم جائے گا۔