لاہور: معروف لوک فنکار عالم لوہار کی تیسویں برسی آج منائی جا رہی ہے پنجاب کی دھرتی کے گیتوں کو دنیا بھر میں خوشبو کی طرح بکھیرنے والا عالم لوہار لالہ موسٰی کے غیر معروف قصبے آچ گوچ میں پیدا ہوا۔ قدرت نے اسے پانچ دریاوٴں سے سیراب ہونے والی دھرتی کی خود رو موسیقی کی ترویج کے لئے پیدا کیا تھا۔ عالم لوہار کے دور میں فنکار کو اپنی پہچان کے لئے برسوں درکار ہوتے تھے۔ مرحوم کی فنی پختگی اسے اس وقت کے موٴثر ترین میڈیم ریڈیو تک لے گئی، یوں دیکھتے ہی دیکھتے اس کی آواز سرحدوں سے بے نیاز ہو گئی۔

لوک داستانیں،صوفیانہ کلام،ماہیئے،جگنی اور بولیوں کو دلکشں روانی سے گانے والا عالم لوہار تیس سال پہلے سڑک کے ایک حادثے میں جان ہار بیٹھا لیکن اس کے ہونہار بیٹے عارف لوہار نے اپنے والد کے انداز کو مشن جان کر کامیابی سے جاری رکھاہے عالم لوہار کی خداداد آواز میں پنجاب کی دھرتی کی سوندھی خوشبو رچی ہوئی تھی جو برسوں بعد بھی لوگوں کی سماعتوں میں رس گھول دیتی ہے ۔