جے پور: بھارت کی ریاست راجستھان کے شہرجے پورمیں سات دھماکوں میں اسی افراد کی ہلاکت کے بعد صبح نو سے شام چھ بجے تک کرفیو نافذکردیا گیا ہے ۔ پولیس نے چار مشتبہ افراد گرفتار کرلئے ہیں ۔جے پور میں منگل کی شام سات بجکر پچیس منٹ پر دھماکوں کا سلسلہ شروع ہوا۔بیس منٹ کے دوران گنجان آباد علاقوں میں سات بم دھماکے ہوئے جبکہ آٹھواں بم ناکارہ بنا دیا گیا ۔بم دھماکوں میں اسی افراد ہلاک اوردوسوافرادزخمی ہوئے جبکہ حکام نے ہلاکتوں میں اضافہ کا خدشہ ظاہر کیا ہے ۔

ریاستی حکومت نے دھماکوں میں ہلاک ہونے والوں کے لواحقین کے لئے پانچ پانچ لاکھ اور زخمیوں کے لئے ایک ایک لاکھ روپے امداد کا اعلان کیا ہے ۔بھارتی پولیس کے ڈائریکٹرجنرل امرجت سنگھ کے مطابق ایمبولینس اوردیگرگاڑیوں کے ذریعے زخمیوں کوہسپتال منتقل کیا گیا ،تمام طبی مراکزمیں ایمر جنسی نافذ کردی گئی اورنئی دہلی سمیت پورے علاقے میں سیکورٹی ہائی الرٹ کردی گئی ۔ انہوں نے مزید کہا کہ دھماکے ہوامحل ،جوہری باز ار،تریپولیا ،مناک چوک اورسنگنیری گیٹ کے علاقوں میں ہوئے۔ دھماکوں کے بعد پولیس الرٹ ہوگئی ہے اورحادثے کی تفتیش وتحقیقات میں مصروف ہے۔

ادھر بھارتی ٹی وی کا کہنا ہے جے پور میں ہونے والے دھماکے جہاں ہوئے وہاں سیاحوں کی آمد ورفت رہتی ہے۔دھماکوں کے بعد دہلی ،ممبئی اور اترپردیش میں ہائی الرٹ کردیا گیا ہے۔عینی شاہدین کے مطابق دھماکوں کے بعد افراتفری مچ گئی۔بعض ذرائع کہہ رہے ہیں کہ چھ دھماکے ہوئے تاہم ساتویں کو بم ڈسپوزل نے ڈی فیوز کردیا تھا۔ان کا کہنا تھا کہ ہلاک شدگان میں زیادہ تر کا تعلق غیر ملکی سیاحوں میں سے تھا۔