وا شنگٹن: امریکی خارجہ پالیسی ماہرین کا کہنا ہے کہ پاکستان القاعدہ کا گڑھ ہے اور دہشت گرد ایٹمی ہتھیاروں پر قبضہ کرسکتے ہیں۔ خارجہ پالیسی کے امریکی میگزین اور سینیٹر فار امریکن پروگریس کے زیر اہتمام ہونے والے سروے میں سو سے زیادہ خارجہ پالیسی ماہرین نے حصہ لیا۔ سروے کے نتائج کے مطابق انہتر فی صد ماہرین نے کہا کہ امریکا اپنی فوج عراق سے افغانستان منتقل کردے۔

اسی فیصد نے کہا کہ امریکا عراق پر بلاضرورت توجہ دے رہا ہے جبکہ اسے اپنی توجہ افغانستان پر مرکوز کرنی چاہئے۔ ستر فی صد ماہرین کا کہنا ہے تھا کہ پاکستان القاعدہ اور دہشت گردوں کی پناہ گاہ ہے جبکہ گزشتہ سال کے سروے میں صرف پینتیس فیصد نے پاکستان کو دہشت گردوں کی پناہ گاہ قرار دیا تھا۔ اکیانوے فیصد ماہرین نے کہا کہ دنیا آج پہلے سے زیادہ خطرناک جگہ ہے جبکہ پچھلے سال صرف ستر فی صد نے دنیا کو خطرناک جگہ قرار دیا تھا۔