برسلز: روسی وزیر خارجہ نے کہا ہے کہ نیٹو روس کے خلاف تعصب کا مظاہرہ کررہا ہے جبکہ روسی فوج کی واپسی شروع ہوچکی ہے۔ روسی وزیر خارجہ سرگئی لاروف نے نیٹو پر الزام لگایا ہے کہ نیٹو تبلیسی کی مجرم حکومت کی سرپرستی کررہا ہے اور اس کے جنگی جرائم کو تحفظ دے رہا ہے۔ انہوں نے کہا کہ جارجیا سے پانچ سو روسی فوجی جمعے تک واپس چلے جائیں گے لیکن دیگر علاقوں سے روسی فوج کی واپسی کا انحصار اس پر ہے کہ جارجیا کس حد تک اپنی ذمہ داریوں کا احساس کرتا ہے۔

ادھر جارجیا کے شہر گوری سے روسی فوج کے قافلے واپس جاتے ہوئے دیکھے گئے ہیں ۔دوسری جانب جارجیا کے وزیر خارجہ نے کہا کہ روسی فوج نے امن فوج کا کردار ادا کرنے کے بجائے جنوبی اوسیشیا پر قبضہ کرلیا ہے۔ انہوں نے مطالبہ کیا کہ دوسرے ملکوں کے فوجی دستے جنوبی اوسیشیا میں تعینات کرے۔

ادھر روس کے صدر دیمتری میدیدیوف نے فرانس کے صدر سرکوزی سے گفتگو کرتے ہوئے کہا کہ آئندہ تین دن میں زیادہ تر روسی فوجی جارجیا سے نکل جائیں گے۔ دوسری جانب جارجیا کی صورت حال پر غور کے لئے اقوا م متحدہ کی سلامتی کونسل کا اجلاس آج مقامی وقت کے مطابق ساڑھے تین بجے سہ پہر ہوگا۔