پیرس: فرانس کا کہنا ہے کہ یورپی یونین روس کے خلاف پابندیاں لگانے پر غور کررہی ہے۔فرانس کے وزیر خارجہ برنارڈ کوشنر نے کہا کہ روس کی جانب سے جارجیا کے باغی خطوں کو آزاد ریاست تسلیم کرنے کا عمل قابل سزا ہے اور اس کے خلاف سخت کارروائی ضروری ہے۔پیرس میں نیوز کانفرنس سے خطاب کرتے ہوئے کوشنر نے کہاکہ یورپی یونین کے کئی ممبران نے روس کے خلاف پابندیوں کی تجویز دی ہے۔

فرانسیسی وزیر خارجہ کے بیان پر تبصرہ کرتے ہوئے روس کے سفیر ولاڈیمیرشیزوف نے کہاکہ یورپی ملکوں کو جذبات سے بالاتر ہوکر فیصلے کرنے چاہیں کیونکہ روس ان کا اہم تجارتی شریک کار ہے یاد رہے کہ یورپی یونین اپنی ضرورت کا ایک تہائی تیل اور چالیس فیصد گیس روس سے خریدتی ہے۔ادھر جارجیا نے سلامتی اور تعاون کی یورپی تنظیم کے اجلاس میں روس پر الزام لگایا کہ وہ جنوبی اوسیٹیا اور ابخازیہ میں جارجین نسل کے لوگوں کا صفایا کررہا ہے۔