بہار: بھارتی ریاست بہار میں سیلاب سے متاثرہ افراد کی امداد کے لئے وزیر اعظم من موہن سنگھ نے دس ارب روپے کا اعلان کیا ہے ۔ بہار میں دریائے کوسی میں طغیانی سے اطراف کے علاقوں میں سیلاب آگیا ہے جس سے دس لاکھ سے زائد افراد متاثر ہوئے ہیں ۔ بھارت کے وزیر اعظم نے سیلاب سے متاثرہ علاقوں کا فضائی دورہ کیا اور سیلاب زدہ افراد کی امداد کی ہر ممکن یقین دہانی کرائی۔

انہوں نے کہا کہ بہار میں سیلاب سے متاثرہ افراد کے لئے ایک لاکھ پچیس ہزار ٹن غذائی اجناس فراہم کی جائیں گی ۔ متاثرہ علاقوں میں بری اور فضائی فوج ہیلی کاپٹر امدادی کارروائیاں کررہی ہے ۔ حکام کے مطابق سیلاب زدہ علاقوں میں موجود افراد کو محفوظ مقامات پر منتقل کرنے کے لئے تین سو ریلیف کیمپ قائم کئے گئے ہیں ۔