ماسکو: اسرائیلی وزیر اعظم ایہود اولمرٹ نے کہا ہے کہ روس نے یقین دہانی کروائی ہے کہ اسرائیل کی سیکورٹی کو کسی قسم کا خطرہ لاحق نہیں ہونے دیا جائے گا ۔خبررساں ادارے کے مطابق اسرائیلی وزیر اعظم ایہود اولمرٹ نے ماسکومیں روسی صدر دیمتری میدویدیو سے ملاقات کی ۔جس میں دونوں رہنماؤں کے درمیان دوطرفہ اسٹرٹیٹجک ڈائیلاگ کو اپ گریڈ کرنے پر اتفاق کیا ۔اسرائیلی وزیر اعظم کا کہنا تھا کہ روس بھی ایران کے جوہری پروگرام کے مخالف ہے جبکہ روسی صدر نے ایرانی صدر احمدی انژاد کے اسرائیل کو دنیا کے نقشے سے مٹانے کے عزائم کو شدید تنقید کا نشانہ بنایا ہے ۔

ایس تھری ہنڈریڈ اینٹی ایئر کرافٹ میزائل سسٹم کی ایران کو فروخت کے حوالے سے اسرائیلی وزیر اعظم کا کہنا تھا کہ روسی قیادت اسرائیل کی اس حوالے سے پوزیشن سے واقف ہے اور جانتی ہے کہ اس سسٹم کی فروخت سے خطے کے استحکام پر فرق پڑے گا ۔واضح رہے کہ اسرائیل کو خدشہ لاحق ہے کہ روس ایران اور شام کو ایس تھری ہنڈریڈ اینٹی میزائل سسٹم فروخت کرسکتاہے جس کے بعد اسرائیل وزیر اعظم نے روس کا یہ دورہ کیا ہے ۔تاہم روسی صدر نے اسرائیلی وزیر اعظم سے ملاقات میں ایسی کوئی ٹھوس یقین دہانی نہیں کروائی ہے کہ یہ میزائل سسٹم ایران اور شام کو فروخت نہیں کیا جائے گا ۔