نیویارک: نو منتخب امریکی صدر براک اوباما نے کہا کہ افغانستان میں القاعدہ کا خاتمہ ، عراق سے فوجی انخلا اور گوانتانامو جیل کی بندش نئی انتطامیہ کی اولین ترجیحات ہیں۔صدر براک اوبامہ نے امریکی ٹی وی چینل سی بی ایس سے انٹر ویو میں کہا کہ انتخابی وعدوں کی پاسداری کی جائے گی اور عراق سے فوج نکال کر دہشت گردی کے خلاف جنگ کا ہدف افغانستان کو بنایا جائے گا، افغانستان میں القاعدہ کے خلاف کارروائیاں تیز اور موثر کی جائیں گی۔ انہوں نے کہا کہ القاعدہ کا خاتمہ اولین ترجیح ہو گی اور اسامہ بن لادن کی فوری گرفتاری یا ہلاکت امریکا کی سیکورٹی کے لئے ضروری ہے ۔

نو منتخب امریکی صدر نے کہا کہ وہ صدارت سنبھالتے ہی عراق کے بارے میں طے شدہ منصوبہ بندی پر فوری عمل کریں گے تاکہ دنیا بھر میں امریکا کے خلاف نفرت ختم کی جا سکے۔ ان کا کہنا تھا کہ گوانتانامو جیل کی بندش بھی اولین ترجیحات میں شامل ہے اور دنیا کو یقین دلانا ہے کہ امریکا تشدد پسند نہیں ہے۔ اوباما نے کہا کہ کانگریس میں ان کی پہلی ترجیح معیشت کو سہارا دینے کے لئے ایک اور پیکج کی منظوری حاصل کرنا ہو گا۔ انہوں نے کہا کہ مالی بحران سے نمٹنے کے لئے نئے قوائد و ضوابط کا نفاذ ضروری ہوگا۔