سری نگر: کل جماعتی حریت کانفرنس کے چیئرمین سید علی گیلانی نے کہا ہے کہ مقبوضہ کشمیر میں ہونے والے انتخابات الیکشن نہیں سلیکشن ہیں۔ کشمیر میں جاری جدوجہد نئی نسل کو منتقل ہو چکی ہے۔ اسلام آباد میں مقبوضہ کشمیر میں نام نہاد الیکشن کے خلاف سیمینار سے ٹیلی فونک خطاب کے دوران علی گیلانی نے کہا کہ بھارت اپنے کئے گئے تحریری معاہدوں کی پاسداری کرے اور آٹھ لاکھ فوج کشمیر سے نکالے۔

ان کا کہنا تھا کہ جموں کشمیر گزشتہ باسٹھ سالوں سے متنازعہ رہا ہے۔ انیس سو باون سے اب تک کوئی ایسا الیکشن نہیں ہوا جس میں لوگوں نے اپنا حق رائے دہی استعمال کیا ہو۔ سیمینار میں ایک متفقہ قرار داد پیش کی گئی جس میں مطالبہ کیا گیا کہ جمہوریت کے خلاف بنائے گئے قوانین ختم کئے جائیں اور سیاسی رہنماؤں کو رہا کیا جائے۔ اس کے علاوہ اقوام متحدہ اور عالمی برادری سے اپیل کی گئی کہ وہ حق خود ارادیت کے حصول کے لئے کشمیری عوام کا ساتھ دیں اور وادی سے فوج کے انخلاء کے لئے بھارت پر دباؤ ڈالیں۔