لندن: برطانیہ نے کہا ہے کہ حالیہ معاشی بحران عالمی نوعیت کا ہے اور اس کے حل کے لئے عالمی سطح پر کوششوں کی ضرورت ہے۔ یہ بات برطانوی وزیر اعظم گورڈن براؤن نے لندن میں یورپی کمیشن کے سربراہ مینوئل باروسو کے ہمراہ صحافیوں سے گفتگو میں کہی۔ گورڈن براؤن نے بحران کے حل کے لئے واشنگٹن میں جی ٹوئنٹی رہنماؤں کے اجلاس میں تجویز کردہ روڈ میپ کے اہم نکات پیش کئے۔

برطانوی وزیر اعظم نے کہا کہ وہ یورپی کمیشن کے سربراہ سے مذاکرات میں جی ٹوئنٹی اجلاس کے فیصلوں پر عملدرآمد کے طریقے پر بات کریں گے۔ مذاکرات میں مالیاتی نظام میں اصلاحات کے نظام الاوقات، بین الاقوامی مالیاتی ڈھانچے کی تشکیل نو، عالمی تجارتی نظام پر جاری مذاکرات کے حتمی نتائج کا حصول اور عالمی سطح پر ایک متحرک مالیاتی نظام شامل ہے۔ یورپی کمیشن کے سربراہ مینوئل باروسو نے کہا کہ یورپی ممالک نے نئے عالمی مالیاتی نظام کی تشکیل کے قوانین وضع کرنے پر رضامندی ظاہرکی ہے تاکہ مستقبل کے بحرانوں سے بچنے میں مدد اور سرمایہ کاروں، کھاتیداروں اور عوام کے تحفظ میں اضافہ ہوسکے۔