واشنگٹن: امریکا نے کہا ہے کہ اس کے پاس اسامہ بن لادن کی موت کے بارے میں کوئی اطلاع نہیں۔ وائٹ ہاؤس کی ترجمان ڈانا پیرینو کا کہنا ہے کہ خفیہ ایجنسیوں کی رپورٹ میں ایسی کوئی بات نہیں کہ القاعدہ کے رہنما اسامہ بن لادن مرچکے ہیں۔ ترجمان کا کہنا تھا کہ القاعدہ امریکا کو نقصان پہنچانے کا کوئی موقع ضائع نہیں کرنا چاہتی، اس لئے اسے روکنا ہوگا۔

وائٹ ہاؤس کی ترجمان نے ایمن الظواہری کے بیان کو غیر منطقی قرار دیا ہے۔ ایمن الظواہری نے امریکی نومنتخب صدر براک اوباما کو خبردار کیا تھا کہ صدارت کا عہدہ سنبھالنے کے بعد وہ عراق اور افغانستان میں مزید فوج بھیجنے کا خیال بھی دل میں نہ لائیں ورنہ نتائج بھگتنا پڑیں گے اور براک اوباما نے اگر بش کی پالیسیاں جاری رکھیں تو ناکام ہوں گے۔