دبئی: دبئی میں ڈیڑھ ارب ڈالر کی لاگت سے تعمیر کردہ اٹلانٹس ہوٹل کے شاندار افتتاح پر دنیا کی سب سے بڑی آتش بازی کا مظاہرہ کیا گیا۔ دبئی میں ہتھیلی نما جزیرہ جو میرہ پر اٹلانٹس ہوٹل کی عظیم الشان افتتاحی تقریب کا انعقاد کیا گیا۔ تقریب پر دو کروڑ ڈالر خرچ کئے گئے جس میں دنیا کی سب سے بڑی اور طویل آتش بازی کی گئی ۔اس دوران ریت کے ساحل روشنیوں سے چندھیا گئے۔ اس موقعے پر ہالی وڈ کے ستاروں کی انجمن سجائی گئی۔

دبئی کے کشتی نما برج العرب سے لے کر دنیا کے سب سے اونچے ٹاور تک بیشتر شاندار عمارتیں اور جگمگاتے ہوٹلز سیاحوں کو اپنی جانب کھینچتے ہیں۔ تقریب کی انتظامیہ کے مطابق گلابی محراب نما شاندار عمارت کے افتتاح پر کی گئی آتش بازی خلا سے دیکھی جاسکتی تھی۔ تقریب میں آسٹریلوی پاپ گلوکارہ کیلی مینوگ، لبنانی گلوکارہ نوال نے بالی وڈ کی اداکارہ پریانکا چوپڑا کے ساتھ مل کر پرفارم کیا۔

پرفارمنس کے لئے گلوکارہ مینوگ نے چالیس لاکھ ڈالر معاوضہ وصول کیا۔ اٹلانٹس کے ایکوریم میں شارک سمیت پینسٹھ ہزار سمندری مخلوقات رکھی گئیں ہیں اور ایک واٹر پارک میں تین ہزار نشستوں سے تیار کردہ بیش قیمت مجسمہ رکھا گیا ہے۔ ہوٹل میں ایک رات قیام کا خرچہ بیس ہزار ڈالر ہے۔ دبئی دنیا کا پانچواں سب سے بڑا تیل برآمد کنند ہ ہے اور خطے کا سب سے بڑا تجارتی مرکزہے۔