واشنگٹن: امریکی خلائی شٹل اینڈی ور کے خلابازوں نے بین الاقوامی خلائی اسٹیشن کے قیام کی دسویں سالگرہ منفرد انداز سے منائی ۔ امریکی خلائی ادارے ناسا نے بتایا کہ اینڈی ور کے خلا باز ہائی ڈی پائپر اور شین کمبروگ نے بین الاقوامی خلائی اسٹیشن کی دسویں سالگرہ کے موقع پر خلا میں ساڑھے چھ گھنٹے چہل قدمی کی۔ خلا بازوں نے اس کام کے لئے اسٹیشن کا ڈی کمپریژن چیمبر مقرر وقت سے پینتالس منٹ پہلے چھوڑ دیا۔

خلا بازوں کی جانب سے خلا میں چہل قدمی ہوم امپورومنٹ پراجیکٹ کا حصہ ہے جس کا مقصد خلائی اسٹیشن میں عملے کی تعداد دو ہزار نو تک تین سے بڑھا کر چھ کرنا ہے۔ اس کے علاوہ خلابازوں نے خلائی اسٹیشن کی مرمت کا مزید کام سرانجام دیا اور ایک زنگ لگے جوڑ کو تبدیل کیا۔ بین الاقوامی خلائی اسٹیشن کا قیام بیس نومبر انیس سو اٹھانوے کو عمل میں آیا تھا اور اس کا مقصد مریخ سمیت نظام شمسی کے بارے میں معلومات حاصل کرنا ہے۔