نیویارک: اقوام متحدہ نے کہا ہے کہ غزہ کی پٹی پر اسرائیلی اقدامات ناقابل برداشت ہیں جنہیں فوری طور پر ختم کرنا ہوگا۔ اقوام متحدہ کے انڈر سیکریٹری جان ہومز نے اپنے ایک بیان میں کہا ہے کہ غزہ میں رہنے والے اس وقت شدید مشکلات سے دو چار ہیں غذائی بحران بڑھتا جارہا ہے اورکرنسی کی قلت ہے جبکہ بجلی کی فراہمی نہ ہونے کے برابر ہے ، پانی اور گیس کی بہت کمی ہے۔

اپنے بیان میں جان ہومز نے کہا کہ اسرائیل کو یہ سوچنا چاہئے کہ ان معاملات میں ان بچوں کا تو قصور نہیں ہے جو بھوک سے بلبلا رہے ہیں اقوام متحدہ کے سیکریٹری جنرل بان کی مون نے اسرائیلی وزیر اعظم ایہود اولمرٹ سے کہا تھا کہ اگر وہ اجازت دیں تو اقوام متحدہ غزہ میں اپنی امدادی ٹیم بھیجے مگر ایہود اولمرٹ نے اس پیش کش کو ٹھکرا دیا تھا ۔جان ہومز کا کہنا ہے کہ اسرائیل کو فوری طور پر پابندی ہٹانی ہوگی تاکہ غزہ میں امداد پہنچائی جاسکے۔