کراچی:  پیپلز پارٹی کے نثار احمد کھوڑو اور شہلا رضا کے سندھ اسمبلی کے اسپیکر اور ڈپٹی اسپیکر منتخب ،آج حلف اٹھائیں گے۔سندھ اسمبلی کے اسپیکر مظفر حسین شاہ نے پریس بریفنگ میں نثار کھوڑو اور شہلا رضا کے کاغذات نامزدگی منظور کرنے کا اعلان کیا۔اسپیکر اور ڈپٹی اسپیکر کے لئے کسی اور امیدوار نے کاغذات جمع نہیں کرائے ہیں اور اس بات کا قوی امکان ہے کہ دونوں بلا مقابلہ سندھ اسمبلی کے اسپیکر اور ڈپٹی اسپیکر منتخب ہو جائیں گے۔اس سے قبل نثار کھوڑو اور شہلا رضا نے نامزد وزیر اعلیٰ سید قائم علی شاہ ،پیپلز پارٹی کے پارلیمانی لیڈر مظہر الحق اور پارٹی کے دیگر ارکان اور رہنماوٴں کے ہمراہ اسمبلی سیکریٹریٹ میں کاغذات نامزدگی جمع کرائے۔

اسپیکر کے عہدے پر نثار کھوڑو کی جانب سے چار اور ڈپٹی اسپیکر کے لئے شہلا رضا کی جانب سے دو کاغذات نامزدگی جمع کرا ئے گئے۔نثار کھوڑو کے کاغذات میں ایاز سومرو ،حاجی مظفر شجرہ ،مراد علی شاہ، سکندر علی ،منور عباسی ،احمد علی شاہ ،شمیم آرا اور مکیش کمار تجویز کنندہ اور تائید کنندہ ہیں۔ ڈپٹی اسپیکر کے لئے شہلا رضا کے کاغذات نامزدگی کے لئے شازیہ مری ،فیاض بھٹو ،سلیم خورشید کھوکھر اور نصر اللہ بلوچ تجویر کنندہ اور تائید کنندہ ہیں۔اس موقع پر پاٹی کارکنوں نے ”جئے بھٹو“اور ”جئے بے نظیر“کے نعرے لگائے۔

کاغذات جمع کرانے کے بعد میڈیا سے گفتگو کرتے ہوئے نامزد اسپیکر نثار کھوڑو نے کہا کہ پارٹی نے مجھے اسپیکر اور شہلا رضا کو ڈپٹی اسپیکر نامزد کیا ہے۔گزشتہ روز اسمبلی میں پیش آنے والے واقعہ کے بارے میں انہوں نے کہا کہ زیادہ لوگوں کے آنے سے اسمبلی میں نا خوش گوار واقعہ پیش آیااور ایسے واقعات سے بچنے کے لیے انٹری پاسز پر نظر رکھنا ہوگی۔نامزد ڈپٹی اسپیکر شہلا رضا نے کہا کہ بے نظیر بھٹو شہید کو خراج عقیدت پیش کرتی ہوں جنہوں نے اپنی جان دے کر جمہوریت کوپروان چڑھایا۔انہوں نے کہا کہ ایوان کا تقدس برقرار رکھنے کے لئے وہ ایوان کے تقاضے کے مطابق حق ادا کریں گی۔