اسلام آباد: وزیر اعظم سید یوسف رضا گیلانی نے پیمرا قوانین کی جانے والی ترامیم کے خاتمے کی ہدایات جاری کر دی ہیں۔ وفاقی کابینہ کا اجلاس وزیر اعظم سید یوسف رضا گیلانی کی صدارت میں ہوا جس میں مختلف امور پر غور کیا گیا۔ کابینہ کا اجلاس میں سندھ کے سابق وزیر اعلیٰ ڈاکٹر ارباب غلام رحیم اور سابق وفاقی وزیر ڈاکٹر شیر افگن نیازی کے ساتھ رونما ہونے والے واقعات کی شدید مذمت کی گئی۔ وزیر اعظم نے دونوں واقعات کے مرتکب افراد کے خلاف فوری کارروائی کی ہدایت کی۔وفاقی وزیر خزانہ اسحاق ڈار نے ملک کی اقتصادی صورت حال پر کابینہ کو بریفنگ دی جس پر کابینہ نے عدم اطمینا ن کا اظہار کیا۔ وزیر اعظم نے کابینہ اجلاس سے خطاب میں کہا کہ وزیر اعظم ہاوٴس کے اخراجات کم کر دیئے گئے ہیں۔ انہوں نے تمام وزراء کو ہدایت کی کہ وہ بھی اپنی وزارتوں کے اخراجات میں کمی کو یقینی بنائیں۔ اجلاس میں وزراء نے اپنی وزارتوں کے حوالے سے ایکشن پلان پیش کیا اور ملک میں امن وامان کی صورت حال پر بھی غور کیا گیا۔