اسلام آباد: وفاقی حکومت نے ملکی تاریخ میں پہلی بار مسلح افواج کے بجٹ کی تفصیلات پارلیمنٹ میں پیش کر دی ہیں۔ سینیٹ میں قائد ایوان رضا ربانی نے بری بحری اور فضائی افواج کے بجٹ کی تفصیلات ایوان بالا میں پیش کیں۔ ایوان میں پیش کی گئی دستاویز کے مطابق دفاع کے لئے دو سو پچانوے ارب تیس کروڑ انہتر لاکھ آٹھ ہزار روپے مختص کئے گئے جن میں آرمی کے لئے ایک سو اٹھائیس ارب انہتر کروڑ ستانوے لاکھ ستاون ہزار روپے، ایئرفورس کے لئے اکہتر ارب چھیاسٹھ لاکھ باسٹھ ہزار اور نیوی کے لئے انتیس ارب تیسرہ کروڑ تینتیس لاکھ گیارہ ہزار روپے رکھے گئے ہیں۔

دفاعی پیداور اور دیگر متعلقہ اداروں کے لئے چھیاسٹھ ارب چھالیس کروڑ اکہتر لاکھ اٹھہترہزار کا بجٹ مختص کیا گیا ہے۔ مجموعی دفاعی بجٹ میں ننانوے ارب ملازمین کے لئے بیاسی ارب چوراسی کروڑ آپریٹنگ اخراجات پچیس ارب تہتر کروڑ روپے سول ورکس اور سفری و ٹرانسپورٹ اخراجات کی مد میں بارہ ارب روپے رکھے گئے ہیں جبکہ فزیکل اثاثوں کے لئے ستاسی ارب تریسٹھ کروڑ روپے مختص کئے گئے ہیں۔