اسلام آباد: پاکستان کے ایٹمی پروگرام کے خالق ڈاکٹر عبدالقدیر خان نے کہا ہے کہ ایران اور شمالی کوریا کو ایٹمی ہتھیاروں کے بلیوپرنٹس فروخت نہیں کئے گئے۔ اسلام آباد میں غیر ملکی نیوز ایجنسی سے ٹیلی فونک انٹرویو میں ڈاکٹر عبدالقدیر خان نے ایران اور شمالی کوریا کو ہتھیاروں کی فراہمی کے بارے میں مغربی ممالک کے الزامات کی تردید کی۔ انہوں نے کہا کہ ایران اور شمالی کوریا کو ایٹمی ٹیکنالوجی فروخت نہیں کی اور اس بارے میں مغربی ممالک کے الزامات بے بنیاد ہیں۔ ایٹمی ٹیکنالوجی کی فراہمی اور پھیلاؤ کے ذمہ دار مغربی ممالک ہیں۔ مغربی ممالک نے ایران اور شمالی کوریا کو ایٹمی ٹیکنالوجی فراہم کی۔

مغربی ممالک اسرائیل کے ایٹمی پروگرام کے بارے میں کیوں ایسی باتیں نہیں کرتے؟ کیوں اسرائیل کے بارے میں کچھ نہیں کہا جاتا؟ ڈاکٹر عبدالقدیر خان نے کہا کہ امریکا اور اقوام متحدہ کے ادارے کو ان تک رسائی کے حوالے سے اقوام متحدہ کے سابق انسپکٹر کے بیان کا مقصد حکومت پاکستان پر دباؤ بڑھانا ہے یہ بات اس وقت سامنے آئی ہے جب مجھ پر سے پابندیاں ہٹانے کے حوالے سے مذاکرات ہو رہے ہیں۔