کر م ایجنسی: کرم ایجنسی میں سیکورٹی فورسز کے قافلے پر عسکریت پسندوں کے حملے میں ڈرائیور جاں بحق ہو گیا۔ سیکورٹی فورسز کی جوابی کارروائی میں پانچ حملہ آور مارے گئے پارہ چنار میں دو گروہوں کے درمیان فائرنگ کے نتیجے میں چار افراد ہلاک ہو گئے۔ کرم ایجنسی میں صدہ سے پارا چنار جانے والے سیکورٹی فورسز کے قافلے پر پیر قیوم کے مقام پر عسکریت پسندوں نے بھاری ہتھیاروں سے فائرنگ کی۔ جس کے نتیجے میں ایک ڈرائیور جاں بحق اور تین زخمی ہو گئے۔ حملہ آوروں نے سیکورٹی فورسز کے قافلے میں شامل غذائی اجناس سے بھرے ہوئے ٹرکوں کو آگ لگا دی۔ واقعے کے بعد سیکورٹی فورسز نے حملہ آوروں کے ٹھکانوں پر گن شپ ہیلی کاپٹروں سے فائرنگ کی جس کے نتیجے میں پانچ حملہ آور ہلاک اور چھ زخمی ہو گئے۔

کانوائے پر حملے کے بعد علاقے کی صورتحال کشیدہ ہے دوسری جانب پارا چنار کے نواحی علاقے شلوزان میں دو گروپوں کے درمیان جھڑپوں میں چار افراد ہلاک اور دو زخمی ہو گئے۔ تازہ ہلاکتوں کے بعد علاقے میں کشیدگی پھیل گئی ہے اور سیکورٹی ہائی الرٹ کر دی گئی ہے۔