مانسہرہ: امیر جماعت اسلامی قاضی حسین احمد نے تمام مجرموں کی سزائے موت عمر قید میں تبدیل کرنے کا اعلان ظلم قرار دے دیا۔ان کا کہنا ہے کہ قاتل کو معاف کرناصرف مقتول کے ورثاء کا حق ہے۔قاضی حسین احمد نے مانسہرہ میں صوبائی امیر سراج الحق اور دیگر رہنماوٴں کے ہمراہ نیوز کانفرنس کی۔ان کا کہنا تھا کہ وزیر اعظم کی طرف سے سزائے موت کے قیدیوں کی معافی ظلم اور نانصافی ہے۔قاضی حسین احمد نے کہا کہ این آر او کے تحت مجرموں نے مجرموں کو معاف کیا اور صدر مشرف کسی محفوظ راستے کے حق دار نہیں۔

انہوں نے کہا کہ چیف جسٹس افتخار محمد چوہدری کو فعال کرکے صدر مشرف کو ان کی عدالت میں پیش کیا جائے۔ان کا کہنا تھا کہ افغان صدر حامد کرزئی کی دھمکیاں دراصل امریکی دھمکیاں ہیں۔قاضی حسین احمد کا کہنا تھا کہ حریت کانفرنس کے دونوں دھڑوں کے اتحاد سے کشمیری عوام کی جدوجہد کو تقویت حاصل ہوگی۔