گوجر انو الہ: گوجرانوالہ میں آٹھ سالہ طالب علم کو اغواء کے بعد بہیمانہ تشدد کا نشانہ بنانے کے بعد قتل کر دیا گیا۔گوجرانوالہ کے علاقے سینسرہ گورائیہ میں چوتھی جماعت کا طالب علم آٹھ سالہ اویس گھر سے دینی مدرسے جانے کے لئے نکلالیکن اسے راستے سے ہی اغواء کر لیا گیا۔ ملزمان نے ٹیلی فون پر اس کے والدین کو دھمکیاں دیں لیکن کوئی مطالبہ نہیں کیا۔

مغوی کے اہل خانہ نے تھانے میں رپورٹ درج کرائی اور اغواء کاروں کے ٹیلی فون نمبرز بھی پولیس کو فراہم کئے لیکن ملزموں نے اویس کی آنکھوں، کانوں اور ناک میں تیزاب ڈالا اور سر پتھر سے کچل کر لاش نہر میں پھینک دی۔ اغواء سے کچھ عرصہ پہلے اویس کے والد محمد اقبال کی اپنے ہمسایوں خرم، اکرم اور سلیمان سے تلخ کلامی ہوئی تھی۔ پولیس انہی پر واردات میں ملوث ہونے کا شبہ ظاہر کر رہی ہے۔

پولیس کے مطابق اویس قتل کیس میں دو افراد کو حراست میں لیا گیا ہے۔اس سفاکانہ قتل سے علاقے میں تشویش کی لہر دوڑ گئی ہے۔ محلے داروں کا کہنا ہے کہ بے گناہ اویس کے خون سے ہاتھ رنگین کرنے والے ملزموں کو عبرتناک سزا ملنی چاہیئے۔ عوامی حلقوں کا کہنا ہے کہ پولیس روایتی ہتھکنڈوں سے ہٹ کر بروقت کارروائی کرتی تو شاید اویس کے گھر والوں یہ دیکھنا نہ پڑتا۔