اسلام آباد: کل جماعتی حریت کانفرنس کے رہنما میر واعظ عمر فاروق نے کہا ہے کہ بھارت مسئلہ کشمیر حل کرنے کیلئے اپنی ہٹ دھرمی ترک کرے۔ اسلام آباد میں پیپلز پارٹی کے شریک چیئرمین آصف علی زرداری سے ملاقات کے بعد میڈیا سے بات چیت کرتے ہوئے میرواعظ عمر فاروق نے کہا کہ آصف علی زرداری نے یقین دہانی کرائی ہے کہ کسی سطح پر بھی کشمیریوں کے جذبات کو نظر انداز نہیں کیا جائے گا۔ ان کا کہنا تھا کہ پیپلز پارٹی حریت کانفرنس کو کشمیریوں کی نمائندہ جماعت سمجھتی ہے۔ پاکستان پیپلز پارٹی کے شریک چیئرمین آصف علی زرداری نے میڈیا سے بات چیت کرتے ہوئے کہا کہ شہید ذوالفقار علی بھٹو سے ہی مسئلہ کشمیر کا وجود شروع ہوا اور اس حوالے سے پیپلز پارٹی شہید بے نظیر بھٹو کے موقف سے پیچھے نہیں ہٹے گی۔

اس موقع پر پیپلز پارٹی کے سیکریٹری جنرل جہانگیر بدر نے مشترکہ اعلامیہ پڑھ کر سنایا۔ اعلامیہ کے مطابق دونوں اطراف سے طلباء، یوتھ، وکلاء، تاجر اور عوام کے منتخب نمائندوں کے وجود کا تبادلہ کیا جائے گا۔ ملاقات کا دوران کل جماعتی حریت کانفرنس کے سربراہ میرواعظ عمر فاروق نے پیپلز پارٹی کے شریک چیئرمین آصف علی زرداری سے بے نظیر بھٹو کی شہادت پر تعزیت بھی کی۔