سوات: سوات کے طالبان نے حکومت سے امن معاہدہ برقرار رکھنے کا اعلان کر دیا جبکہ منگلور میں عسکریت پسندوں نے پولنگ اسٹیشن پر قبضہ کر کے مورچے بنالئے۔ کبل میں پولیس چوکی پر حملے میں ایک اہلکار جاں بحق ہو گیا۔ مولانا فضل اللہ کی سربراہی میں تحریک طالبان سوات کی مرکزی شوریٰ اور کمانڈروں کا اجلاس نامعلوم مقام پر ہوا۔ اجلاس میں سرحد حکومت سے امن معاہدہ برقرار رکھنے کا فیصلہ کیا گیا۔ شوریٰ نے مذاکراتی ٹیم کو صوبائی حکومت سے آخری اور فیصلہ کن بات چیت کی اجازت دی ہے۔

اجلاس میں طالبان ترجمان مسلم خان نے کہا ہے کہ سوات سے فوج فوری واپس بلائی جائے اور اگر سیکورٹی فورسز نے طالبان کے خلاف کارروائی کی تو بھرپور جواب دیں گے۔ ادھر سوات کی تحصیل مٹہ کے علاقے گوالیری میں نامعلوم افراد نے پولیس چوکی اور ملحقہ پولیس کوارٹر کو آگ لگا دی۔ عسکریت پسندوں نے سوات کے علاقے منگلور میں بیلاگٹ پولنگ اسٹیشن پر قبضہ کر کے مورچے قائم کر لئے۔ یہ پولنگ اسٹیشن پی ایف اکاسی میں واقع ہے جہاں ضمنی انتخابات کے سلسلے میں کل پولنگ ہو گی۔

دوسری جانب تحصیل کبل کے علاقے شاہ ڈھیرئی میں عسکریت پسندوں نے پولیس چوکی پر حملہ کیا فائرنگ کے نتیجے میں ایک اہلکار جاں بحق اور تین زخمی ہو گئے۔ سوات کے علاقوں رونیال، سیچنڑیال، الہ آباد، گاشگوڑ اور چپریال کے علاقوں میں سات گرلز اسکول نذر آتش کر دیئے گئے۔ جس کے بعد چوبیس گھنٹوں میں جلائے گئے اسکولوں کی تعداد نو ہو گئی ہے۔