اسلام آباد: پاکستان کا کہنا ہے کہ افغان صدر حامد کرزئی اپنی ناکامیوں پر پردہ ڈالنے کے لئے سرحد پار دہشت گردی کے جھوٹے الزامات لگا رہے ہیں۔ وزیر دفاع احمد مختار نے اے ایف پی سے بات چیت کرتے ہوئے کہا کہ افغان صدر حامد کرزئی پر حملے میں آئی ایس آئی کے ملوث ہونے کا الزام بے بنیاد ہے۔

ان کا کہنا تھا کہ افغان صدر اپنی ناکامیاں چھپانے اور اقتدار کو طول دینے کے لئے ایسے الزامات لگا رہے ہیں احمد مختار نے بتایا کہ حامد کرزئی نیٹو ممالک سے کئے گئے وعدے پورے کرنے میں ناکام رہے ہیں اور اس کی ذمہ داری وہ پاکستان پر عائد کرتے کر دیتے ہیں۔

انہوں نے کہا کہ آئی ایس آئی ذمہ دار ایجنسی ہے اور دوسرے ممالک کے معاملات میں مداخلت نہیں کرتی۔ پاکستان افغانستان میں استحکام چاہتا ہے اور اس مقصد کے لئے کابل سے خوشگوار تعلقات چاہتا ہے۔